كلمات دوامة رحمه وليد

كل اللي داق الفقر من مُره اشتكى ..
اللي بيداري ف دموعه عشان عنيه متقولش نفسي ..
واللي عايش لسه بحلم
واللي بتهيألوا ان الذكريات هتعود إليه
واللي عايش بسعى
واللي لسه بقول يارب ده كله ليه ؟!
واللي مش لاقي الدوا وبيداري آلمه من الوجع
واللي قال انا حلمي طب
بس م الفقر اتمنع
واللي نام من غير غطا
واللي م البرد اتلسع
واللي عانا سنين بخوف
واللي قال انا لسه بدري
بكره هكبر وابقى اشوف
فجأه روحه لقاها تايهة بين زحام
اللي ضاع منه حبيبته
واللي بيعيط لخيبته
واللي مش همه الا هيبته
واللي ماشي يلوم ف نفسه
واللي قطر الدنيا دايسه
وكل دول لعنة ظروف
قولنا يمكن فترة هتعدي بآلامها ..
دوامتها لسه دايره
ولسة تايهين بين زحامها
و ورائها بنشوفو أمامها
وكل ده بفقر الظروف

قولنا هننام بالساعات
لسه بردوا الفكر فينا
قولنا ناخد كل ما يكفي علاج
لسه بردوا وجعنا فينا ..
اللي ربت ف اليتامى
واللي شال م الحزن ياما
واللي عايش مكتئب
واللي ضحكته لونها باهت
واللي شايل حمل اتقل م الصخور
واللي جوه آلامه بايت
واللي لما الفجر يدن فجأه يبكي وهو ساجد

واللي بحسب ف الدفاتر
فجأه يلقي ديون كتير
يجي يهرب او يموت
يلقى تأنيب الضمير
بكره تفرج اديني عايش
ده اللي فاضل مش كتير

اللي عدى اليوم عليه وهو ببكي بالساعات .. ابكي اكتر
لكن ابكي من سكات
شوف حقايق كل ليله
واوعى تلجأ للعتاب
هو البكا ..
ايه غيرو طهار القلوب
اغسل ف وجعك بالبكا
واسجد وخلص ف الذنوب
واوعى تبكي ف حضن ندل
ربك ده سمااع الشكاوى
وهو وحده اللي حكمه عدل ..
اللي عايش يتوجع م القريب ومن الغريب ويقول مسامح
وان مره يجرح
يقولي جرحه مكانش جارح ..

اللي يفطر لقمه حاف ويقول كفا
كل الوضوح أصبح خفا
بكره الوجع هيكون شفا
كل اللي داق حرمان وذل
هيجيلو يوم وهيتعفى

اللي ربى سنين وكبر
واللي ع أبوه بيكبر
واللي شايف نفسه راجل
واللي شاف م الخير وناكر
واللي عاش حامد وشاكر
واللي قال ولحد امتا
هفضل اتحمل واعافر
عاوزه اقولك ..
ان مهما تلف بينا دوامتها
هيا ورقه ..
لما تسقط دي نهاية سكتك
عافر وزيد من قوتك
طول ما ربك لسه شايف قلب بتحمل كتير
هتلاقي يوم زايد ف ايدك كل خير ..

اللي قال طول عمري بسهر ع الكتاب
واللي قال مقفول ف وشي من الأمل ميت الف باب
واللي لفو سيجاره قال ينسوا العذاب
ايوه دول حبة شباب
نفسهم يلقوا الونس
بس جم ف بلاد غريبه
ان مره يضحك وشهم
تطلع الضحكة كئيبه..

ربنا طبطاب قلوب
ياخد رضا يغفر ذنوب
علشان كدا ..
بص على اللي أقل منك واحمدوا ..
ربك مبيدمعش شخص
غير وبعدها يسعدوا .