كلمات شيلة من وين لك شبل الدواسر كلمات الشيلات

كلمات : سلطان بن بتلاء
ألحان وأداء : شبل الدواسر

من وين لك كل هذا الحسن ياام الخمار ؟
البارحه جاب فيني زينك الغايبه

كشفتي اللي سرق قلبي نهار ٍجهار
علمتك السرقه من أموالي السايبه

عجزت أداري الذهول ونظرة الانبهار
وانا احسب اني ثقيل ودهشتي غايبه

وان قامت الشمس تمزج في بياضك حمَار
قلت الشفق مع حضور الشمس وش جايبه؟

وان قلت سلسال والا عقد قلتي مجار
ذا عقد لكن فصوصه بنحري ذايبه

الله يلوم اللي يلومه بهالانصهار
ياليته يصيبني مثل الذي صايبه

ومعنق ٍ طوله يخليه ياخذ قرار
إليا تحسّف يردّ الكلمه العايبه

ان قلت عين الوحش؟ وان قلت عزة حرار؟
قل اي اجابه واقول : اجابتك صايبه

يارب ثبتني ليادار ذاك الحوار
النظره المذنبه ، والبسمه التايبه

يالله تعالي نمارس لذة الانتصار
وافرّح اصحاب قلبي واقهر عداي به

بردت بك كبدي من الصبر والانتظار
عقب مانفسي من اشباه البشر طايبه

انتي دخولك حياتي كان رد اعتبار
لايامي المجدبه ، وظنوني الخايبه !