كلمات اغنية موجز الأشجان ماجد خضير

انا اللي كل ما قام السواد يعانق الخذلان
جلس يرقب خيوط الفجر من وجده ومن حرقه
اواكب كل حاجه في حياتي بس بعض احيان
تقول اني سجينٍ عبرته فالحلق متدرقه

يا وجدي وين ابلقى السلوه اللي تنعش الوجدان
واصدّر لي حكم في ضيقةٍ في الصدر منزرقه
هبوب الريح لا هبت ونجم سهيل لا من بان
هواويٍ خذا الدرب الطويل وزانت الطرقه

ما خاواني سوا نجمٍ عليه توجه البدوان
تباشر به وكلٍ قام مستعجل على الزرقه
اشوف المزن في عرض السماء متقافيه هتان
واشوف الليل يقفي لا سطع في لحضته برقه

تكاشف وجه خلي كنه البراق والامزان
بياضٍ ما ستر حتى تحت جلده خضر عرقه
حبيبٍ جيته خير وغيابه ضيقة وحرمان
تباشر به طواريق الشعر وتنوح مع ورقه

وجديلٍ لا انتفض ليله تحرك موجز الاشجان
تشيل الضيق من بين الحنايا العوج وتحرقه
لو اسهب في تفاصيله يبي له موقع وديوان
وقافٍ لو يشيب العمر ما شيبت في طرقه

اخْذني من يدين الضيق والاوهام والاحزان
واخذته طرق من فوق الخشوم ولا هو بسرقه
اخذ له موقعن بين الحنايا واعلن استيطان
وعطيته ما تمنى لين في قلبي ظهر فرقه

عشقته مثل عشق مطير للصفرا وللصمان
وحكمني مثل حكم مطير من غربه ليا شرقه
ملكني يوم انا ماني بمملوكٍ لأي انسان
واخذ قلبي معه من يوم ما شد وسكن عرقه