كيف اجازيك كلمات صالح ال مانعه

يا صاحبي في وقفتك كيف أجازيك
وأنا أدري إنك ما تدوّر عوضها
ما يجعل الأحرار مثل المماليك
إلا معاريف الرِّجال ببعضها

الناس ما خلقت حواليك ترضيك
مثلك مقادير الولي تعترضها
أخير لك لا تندفع في هقاويك
تلمّس الأعذار ولا افترضها

ما فيه شي إلا ليا راد واليك
ولا فيه صعبة كان ربك فرضها
اللي ما تقسم ما تجي في مراميك
لو كان تلحم بندقك وتحفظها

ورمي الركاده غير رمي التماتيك
والفرق في هذي وهذي غرضها
اكحل عدوك من سعادة مصافيك
ولا يشغلك غيب القلوب ومرضها

يظهر صديقك ويتبين معاديك
كذا الحياة بما تلاقيك خضها
وسّع مفاهيمك وجوّد مباديك
وكرامتك عن ما يشوب انتهضها

دايم جناحين المعزّة تعليك
بالك لحاجات النفوس تخفضها
إلا الوفا خل الوفا من مساعيك
عملة رجال اتعدها وتحفظها