كلمات شيلة هلت سحايبها فلاح المسردي

هلت سحايبها مــن الحب هـتَّان
واستبشرت قـاع الـفؤاد بحيـاهــا

ثم أشرقت شمسٍ على قلب بردان
واستنعشت كل العروق ابـدفـاهـا

وازهر ربيع القلب مـن كـل الالوان
وهبَّت عـلى صدري نسايم هواهـا

نســايمٍ ذعـذاعـها داعب اغصـان
خضرٍ شعاع الشمس يطرد نداها

وغنَّت بصوت الورق عذبات الالحان
واطرب جميع احساس فيني غناها

قالت لــي بدارك مقاصيد والهان
وغاية مقاصيـدي بـدارك رضـاهـا

قلت أرحـبي ياسيدة كـل مـن كان
داري قـبل لاالقاك ممحل ثـراهــا

شوفك سقاني بعد ماكنت ظميان
والروح باحسانك قطعتي ضماهـا

ونورك جلا ياالمترفه ليل الاحزان
واسترجعت حــلو الليالي ضياهـا

والبسمه اللي بـاتت بحجر سجان
تحررت مـــن جـــور هـمٍّ سباهــا

من صادق اعماق الغلا سر وعلان
اقبل علىٰ النفس العزيزه عطاها

يامستحل القلب والحب سلطان
كــل المشـاعـر بـايعـتـلك ولاهــا