لا اغربت شمس العصر
قامت افكاري تجول
كل هم ايروح تاتيني اهمومٍ وراه

الحياة صدوفها ماسكه وياي دول
غير أنا راسي كما النير وجبال السراه

وما يخلي دق قلبي مثل دق الطبول
كود فرقا كنها بالصدر جمرة قضاه

يا حبيبي ما بعد زولك بالأزوال زول
البصر من دون شوفك تساوى معّ عماه

ابتعادك بحرن ايهول وامواجه تهول
ووصلك ولقياك وسط البحر سترة نجاه

[the_ad id=”177″]

الزكاة بديننا تندفع لا دار حول
من ملك له مال ولا جمال أو كم شاه

وانت تملك زينً ايعجز كبار العقول
مفترض تدفع على زينك الطاغي زكاه

لا تلوم اللي لا مريته ايصير امهبول
انت لو انك تمر الجبل ينزح وراه

الجفول ان شاف زولك غدا ماهو جفول
انت حبك يزرع اشعور في جوف الحصاه

كل ما جيت اوّصفك ياتي لعقلي ذهول
يختفي وجه القمر ينقصر عنق المهاه

اخذ من ضي القمر يا بعد عمري غسول
يمكن ايحسدك علشانك امهمش ضياه

كن في خدينك اورود والريق امعسول
لا تلوم النحل لا جاك من كل اتجاه

انت كنك فصل واحد جمع الأربع فصول
يا ربيعه يا خريفه مصيفه يا شتاه

انت للقلب الشقي غيمً امطاره سيول
انت يومن صبحه بوجهك وشعرك مساه

والله ان العقل ماله مع غيرك ميول
والله ان القلب يا زين ما غيرك خذاه

العيون وساع ومن الحلا كن بك خمول
كل ما سلهمت بالرمش مشاء الله علاه

ما اظن اللي بعينك كحل يمكن كحول
من يشوف اعيونك ايصير وضعه هاه هاه

يا صلاة الله وسلم على وجه الرسول
وش عيون الحر ولاّ وش الخيل وقطاه

حط يدّينك بيديني وخل العذول
تحترق واتقول من حرقها بالكبد آه

من بقلبك يا هوا البال يلقى له قبول
والله ان ذي دعوته كل ما صلى صلاه

ما يقول إلا عسى عمري وعمرك يطول
من يحبك يكره الموت ويحب الحياه

ماني أحب الفضول ومعك كلي فضول
كل شيً يبتدي معّك ما ابغي منتهاه

كل ما ناديتك أبغي أعبر يا لبتول
وقلت لي لبيه وامر تدلل يا غلاه

يثقل لساني واضيّع ولا ادري ويش أقول
مدري والله وش بلاني ولا ادري وش بلاه