كلمات شيلة أخر حلقة فلاح المسردي

اطلب اللي شرع ابوابه مهي منغلقه
في وجيه عباده اللي يرتجون افضاله
ولا توقف في وجيه العالم المنطلقه
من وقف في وجيهها ماهو يسرك حاله

وش تسوي يا الشجاع وناطحينك شلقه
كم شجاع تربوها له وهو بلحاله
والحقيقه دايما تطلع مع آخر حلقه
قد بعضنا راس ماله غترته وعقاله

فيه رجل من صلاة الصبح مثل الطلقه
مجتهد ولا يحصل غير ما الله قاله
وفيه رجل حظه العاثر نشب في حلقه
وفيه رجل ما تعب والله مزينها له

انما الأرزاق عند الله ويعطي خلقه
لا هي بالقوة ولا هي بحيلة الحياله
لا تدور عذر واهي للخطا وتختلقه
ذم ربي في البنادم كثرة استعجاله

ولا تحوش الرزق من عوج الدروب الزلقه
ولا تسوي ما تسوي العالم البطاله
واقترح على السنافي ما يضيق خلقه
دام ربي كافل رزقه ورزق عياله