تتنفسك دنياي كلمات عبدالمجيد عبدالله

مو بس أحبك أنا تتنَفّسِك دنياي
وإتخَيّل إني وصلت المرحلة في الروح
خجلان من طيفك اللي متعبه وياي
من زود ما انت على بالي تجي واتروح

الله لو تدري قلبي وش كثِر مملاي
شوق لعيناك وشوق لوجهك المملوح
وش قد أرتّب كلامي لك قبل ملقاي
وش قد يضيع الكلام بشوفتِك والبوح

غلاك عوقي وهو نفسه لِعوقي دواي
كِن بُعدِك اليَم ووصلِك هو سفينة نوح
ما تبتهِج نفسي إلاّ وإنت في يمناي
وما يلوي ذراعي إلاّ ضيقتك والنوح

وجودك بعمري شي مثل الهوى والماي
وغيابك أبسط تعاريفه شِقا وجروح
ردّيت روحي برجوعك يا بعدي ومناي
ويا الضحكة اللي أصير إلها فِدا وأروح

لِك يا هنوف الخِصال مْحبةٍ في دْماي
تملا بلاد الضباب اللي بشذاك اتفوح
كنت الحبيب وغديت اليوم كل دنياي
من توأم الروح إلين أمسيت إنت الروح